Од 26 до 28 февруари 2024 година, тимот на Македонски Каритас вклучен во проектот YourJob II, учествуваше на Регионалната конференција насловена „Вработување на младите – предизвици и можности“, која се одржа во Подгорица – Црна Гора.

Конференцијата ја отвори надбискупот на Бар и претседател на Каритас Црна Гора монс. Рок Ѓонлешај. Поздравни зборови упати г-дин Марко Ѓеловиќ, директор на Каритас Црна Гора, кој истакна дека невработеноста кај младите е глобален проблем, а со тоа и во Црна Гора. Координаторот на Македонски Каритас г-дин Спасе Спасов ги презентираше планираните активности на проектот YourJob II во Македонија.

По воведните поздрави и зборови за поддршка за програмата YourJob II и презентацијата на програмата, беа организирани две панел дискусии, на кои беа споделени искуства и примери на добри пракси.

Програмата „YourJob II“ е регионален проект за создавање можности за вработување на младите на Балканот и се реализира од 2019 година. Конкретните активности ја зголемуваат конкурентноста на младите на пазарот на труд и влијаат на намалување на невработеноста кај младите. Програмата се спроведува во Албанија, Босна и Херцеговина, Косово, Србија, а од оваа година се спроведува и во Македонија и Црна Гора.

Во Македонија проектот го спроведува Македонски Каритас во општините Струмица, Босилово, Василево, Ново Село, Гевгелија и Богданци. Проектот е поддржан од Реновабис и од Каритас Австрија.