Од 18 до 22 ноември 2024 година, во работна посета на Македонски Каритас престојуваше Вера Викторија Молл, проектен координатор на Каритас Австрија. За време на посетата таа оствари средба со директорот на Македонски Каритас, о. Зоран И. Стојанов, како и со тимот. За време на средбата, директорот Стојанов искажа благодарност до Каритас Австрија, за долгогодишната плодна партнерска соработка како и за подршката во имплементацијата на различните проекти. Таа искажа особен интерес за тековните проектни активности и програми кои ги имплементира Македонски Каритас, како и за предизвиците при работата. За време на работната посета, претставничката на Каритас Австрија имаше можност да направи теренска посета на корисници, да се запознае одблиску со работата на Едукативните центри на Македонски Каритас во Шуто Оризари и Сарај (општина Босилово), при што од страна на тимот имаше можност лично да слушне за работата и проектните активности на овие центри и предизвиците со кои се соочуваат. Важен дел од работната посета беше и средбата во локалната канцеларија на Македонски Каритас во Струмица, која работи во рамките на проектот Your Job II. Таму од страна на тимот на Македонски Каритас беа презентирани досегашните резултати, постигнувања и идни планирани активности во рамките на овој проект.

Дополнително Вера Викторија Молл имаше можност да учествува на Регионалната конференција “Борба против бездомништвото – општествени одговори и одговорности”, која се одржа од 20 до 21 ноември 2024 година во организација на Македонски Каритас, ЗГ Љубезност – Скопје и АДРР Сонце – Тетово.